'माओवादीं वाम व लोकतान्त्रिक गठबन्धन स्यंकेत स्वयाच्वन'
भूमिसुधार मन्त्री डम्ब श्रेष्ठं माओवादीं आःया वाम व लोकतान्त्रिक गठबन्धन स्यंकेत स्वयाच्वंगु द्वपं बियादीगु दु ।
सुकुम्वासीतय्त पुर्जा वितरण यायेत बिहीवाः परासी थ्यंकादीम्ह श्रेष्ठं माओवादी राष्ट्रिय निकास मालेगु पलेसाः वाम व लोकतान्त्रिक शक्तितय् ध्रुवीकरण यानाः फाइदा कायेत स्वयाच्वंगु धयादिल । वय्कलं देशय् वाम व लोकतान्त्रिक शक्तित दथुइ ध्रुवीकरण जूसाः तःधंगु दुर्घटना जुइगु धयादिसें वर्तमान गठबन्धन कायम यानातयेमाःगु खँय् बः बियादिल ।
नेकपा (माले)या नेता नं जुयादीम्ह श्रेष्ठं प्रधानमन्त्रीया निंतिं जूगु न्हापांगु चरणया निर्वाचनय् माओवादीं एमालेयात याःगु धाःगु समर्थन नक्कली जूगु टिप्पणी नं यानादिल । मन्त्री श्रेष्ठं वास्तविक रुपं माओवादीं एमालेयात समर्थन याःगु खःसा प्रचण्डं थःगु उम्मेदवारी लितकायेमाःगु धयादिसें अथे मजूगुलिं माओवादीया समर्थन नक्कली जूगु व उकीं एमालेयात झंग ल्ह्येगु ज्या जक जूगु धयादिल ।
वय्कलं बुहमतीय सरकारं संविधान निर्माण व शान्ति प्रकृयायात निष्कर्षय् थ्यंकेमफइगु धयादिसें सहमतिय सरकार गठन यायेगु लागि प्रचण्ड व रामचन्द्र पौडल निम्हेसिनं उम्मेदवारी लितकायेत इनाप यानादिल ।
