माओवादी कार्यकर्ताया हत्या / प्रतिरोध रणनीति नालेगु ख्याच्वः
एकीकृत नेकपा (माओवादीं) थःगु पार्टीया कार्यकर्तातय्त स्यायेगु श्रृंखला मदीउगु धासें सरकारयात प्रतिरोध रणनीति नालेगु ख्याच्वः ब्यूगु दु ।
बुधवाः बहनी बाराया परशुरामपुर-१ जेलगाँवामाय् थःगु हे छेँ द्यनाच्वंगु इलय् अज्ञात पुचलं ३८दँया माओवादी कार्यकर्ता खेशारीप्रसाद यादवयात गोलीं क्येकाः स्याःगु विरोधय् बिहीवाः माओवादी प्रवक्ता दिनानाथ शर्मा छगू प्रेस विज्ञप्ति पिथनादिसें हत्याया बारे तत्काल छानबिन यानाः हत्यारायात कारवाही यायेत माग यानादीगु दु ।
विज्ञप्तिइ हत्यारायात कारवाही मजूसाः पार्टी व जनसमुदायया पाखें थःगु सुरक्षाया निंतिं प्रतिरोध रणनिती विकास यायेमाःगु अवस्था वःसा उकीया जिम्मेवारी वर्तमान सरकारं हे क्येमालीगु खँ न्ह्यथनातःगु दु । अथेहे विज्ञप्तिइ यादवयात राष्ट्रिय शहीद घोषणा यायेत, यादवया छेँजःयात क्षतिपूर्ति बीत नं माग यानातःगु दु ।
मदुम्ह यादव माओवादी बारा जिल्ला समितिया दुजः व वाईसीएल भोजपुर राज्य समितिया दुजः खः ।
