एमाले व मोर्चाया समर्थन कांग्रेसयात : केसी
नेपाली कांग्रेसया प्रवक्ता अर्जुननरिसंह केसीं प्रधानमन्त्रीया निंतिं जुइगु स्वंगूगु चरणया निर्वाचनय् नेकपा (एमाले) व मधेशी मोर्चां कांग्रेसयात समर्थन याइगु दावी यानादीगु दु ।
बिहीवाः सुथय् विदुरय् च्वंगु थःगु छेँय् पत्रकारत नाप खँल्हाबंला यानादिसें केसीं एमाले व मोर्चानाप कांग्रेसं खँल्हाबंला यानाच्वंगु धयादिसें निगूलिं पक्षया समर्थनं १७ गते जुइगु निर्वाचनय् कांग्रेसया उम्मेदवार प्रधानमन्त्री ल्यइगु धयादिल । निगूगु निर्वाचन तक एमाले व मोर्चा नाप आवद्ध प्यंगू मधेशवादी दल तटस्थ च्वंगु खः । कांग्रेसयात निर्वाचन त्याकेत निगूलिं पक्षया समर्थन आवश्यक जू ।
पत्रकार नाप खँल्हाबंला यानादिसें केसीं विश्वव्यापी लोकतान्त्रया मूल्य व मान्यता कथं माओवादी निशस्त्र मजुइकं एमाले व मोर्चां माओवादीयात समर्थन मयाइगु दावी नं यानादिल ।
