थप ग्वाहालि यायेत एडीबीयात प्रमया इनाप

प्रधानमन्त्री माधवकुमार नेपालं नेपाःया विकास निर्माण यायेगु ज्याय् थप आर्थिक ग्वाहालि यायेत एसियाली विकास बैंकयात इनाप याःग दु ।

नेपाःया भ्रमणय् दीम्ह एडीवीया अध्यक्ष हारु हितो कुरेहानाप बुधवाः खँल्हाबंला यानादिसें प्रधानमन्त्री नेपालं थ्व इनाप यानादीगु खः । वय्कल्ं सरकारं मध्यपहाडी राजमार्ग, येँ निसें तराई स्वाइगु फास्ट ट्रयाक निर्माण, पूर्व-पश्चिम, येँ-वीरगाज, येँ-पोखरा व येँ-चीन स्वाइगु रेलवे सेवा बिस्तार यायेगु योजना न्ह्याकाच्वंगु जानकारी बियादीगु खः ।

उगु इलय् कुरेहां न्हापा नेपालय् शान्ति स्थापना यायेत प्रधानमन्त्री नेपालयात इनाप यानादिसें नेपालय् शान्ति व स्थिरता लिपा नेपाःया विकासयक आवश्यक ग्वाहालि यायेगु प्रतिबद्धता प्वंकादिल ।