आः मधेशी मोर्चा तटस्थ च्वनीमखु : यादव
प्यंगू मधेशी दलत दुथ्याःगु मधेशी मोर्चाया छगू घटक मधेशी जनअधिकार नेपालया अध्यक्ष उपेन्द्र यादवं स्वंगूगु चरणया प्रधानमन्त्री निर्वाचनय् मोर्चा तटस्थ मच्वनीगु खँ धयादीगु दु । निक्वः तक तटस्थ च्वंगु मोर्चां मेगू चरणय् थःपिनिगु आधारपत्रय् सहमति प्वंकीगु दलयात समर्थन याइगु खँ वय्कलं धयादिल ।
रिपोटर्स क्लबं बुधवाः याःगु साक्षात्कार ज्याझ्वलय् न्ववानादिसें यादवं मोर्चां तःगु मागत न्हापाया सरकार व मधेशीत दथुइ जूगु २२ बुँदे व ८ बुँदे सम्झौता कथं हे जूगु धयादिसें थुकीयात सरकारय् वनेगु 'बार्गेनिङ' कथं कायेमज्यूगु धयादिल । वय्कलं स्वायत्त मधेश प्रदेशया खँय् सहमति मजुसाः मोर्चा मंकाः रुपय् संघर्षय् कुहांवइगु ख्याच्वः नं बियादिल ।
वय्कलं मोर्चां माओवादी व कांग्रेस निगूलिं दलयात समान रुपं स्वःगु धयादिल । तर वकय्लं माओवादीं लडाकु समायोजन व वाईसीएलया अर्ध सैन्य संरचना भंग यायेगु विश्वासनिय आधार तयार याःसा प्रधानमन्त्रीया निंतिं माओवादीयात समर्थन यायेफइगु आधार निर्माण जुइगु धयादिल ।
