'राष्ट्रिय सहमतिय सरकारं जक संविधान निर्माण यायेफइ'
एनेकपा (माओवादी) व नेपाली कांग्रेस प्रधानमन्त्री निर्वाचनय् थःथःगु पक्षय् समर्थन जुटे यायेत लगे जुयाच्वंगु इलय् माओवादी उपाध्यक्ष डा. बाबुराम भट्टराईं सहमतिय सरकारं जक शान्ति व संविधान निर्माण यायेफइगु खँ धयादीगु दु । वय्कलं माओवादी, कांग्रेस, एमाले लगायत मधेशवादी दलत दुथ्याःगु राष्ट्रिय सरकारं जक शान्ति प्रकृयायात पूवंके फइगु धयादिल ।
थःगु कार्यकाल क्वचायेकाः लिहां झायादीत्यंम्ह बेलायती राजदूत एन्ड्रिउ हलनाप बुधवाः खँल्हाबंला यानादिसें नेता भट्टराईं साउन १७ गते जुइगु प्रधानमन्त्रीय निर्वाचन पाखें नं प्रधानमन्त्री ल्यये मफुसाः मेगू विकल्प मालेमाःगु व अज्याःगु विकल्प सहमतिय माध्यमं सरकार गठन यायेगु खँ धयादिल ।
उगु इलय् बेलायती राजदूत हलं नं राजनीतिक दलत दथुइ सहमति यानाः मंकाः सरकार गठन यायेमाःगु व अज्याःगु सरकारं शान्ति प्रकृयायात क्वचायेके माःगु खँ धयादीगु खः ।
