खनालया उम्मेदवारी लितकाःगु विरुद्ध सर्वोच्चय् रिट
प्रधानमन्त्रीया लागि नेकपा (एमाले) पाखें उम्मेदवार जुयादीम्ह पार्टी अध्यक्ष झलनाथ खनालया उम्मेदवारी लितः काःगु विरुद्ध सर्वोच्चय् रिट दायर जूगु दु । व्यवस्थापिका संसदया कार्यसंचालन नियमावली विपरीत प्रधानमन्त्री माधवकुमार नेपालं खनालया उम्मेदवारी प्रस्ताव लितकाःगु धासें अधिवक्तात रमेशप्रसाद खनाल, कुमार आचार्य, भविश्वर गुरुङ लगायतं मंगलवाः सर्वोच्चय् रिट दायर याःगु दु ।
संसद सचिवालयलय् दर्ता जूगु प्रस्ताव सभामुखया लिखित अनुमति कयाः जक लित कायेमाःगु प्रावधान विपरीत प्रधानमन्त्री नेपालं उम्मेदवारी लितकाःगु धासें उकीया सम्बन्धय् अन्तरिम आदेश जारी यायेत माग यासें रिट दायर याःगु खः । रिटय् खनालयात वइगु १७ गते जुइगु प्रधानमन्त्रीया निर्वाचनय् उम्मेदवार दयेकेगु कथं अन्तरिम आदेश जारी यायेमाःगु माग नं यानातःगु दु ।
