संविधानसभा भंग या : थापा
राष्ट्रिय प्रजातन्त्र पार्टी नेपालया अध्यक्ष कमल थापां संविधानसभा भंग यायेमाःगु माग यानादीगु दु । वय्कलं वर्तमान संविधानसभायात भंग यानाः न्हूगु जनादेशय् वनेमाःगु बिचाः प्वंकादिल । दलतय् कारणं जनताय् निराशा अप्वया वंगु धयादिसें थापां थप याःगु संविधानसभाया ईया दुने नं न्हूगु संविधान जारी मजुइगु दाबी यानादिल ।
मंगलवाः बाराया सिमराय् विमानस्थलय् पत्रकारत नाप खँल्हाबंला यानादिसें वय्कलं शान्ति प्रकृया, संविधान निर्माण व राष्ट्रिय सहमतिया निंतिं संविधानसभाया ई दच्छि थप याःगु तर दलत थुकीया उल्टा न्ह्याः वनाच्वंगु धयादिल । वय्कलं दलत संविधानसभाया ई थप याःगु मर्मया विपरीत न्ह्याः वनाच्वंगुलिं संविधानसभा भंग यानाः न्हूगु जनादेशय् वनेमाःगु धयादिल ।
वय्कलं निगूगु चरण तक नं प्रधानमन्त्रीया निर्वाचन पाखें प्रधानमन्त्री ल्यये मफुगु धयादिसें दलतय्सं कृतिम सम्झौता यानाः परिस्थितियात ताःहाकेत स्वयाच्वंगु द्वपं बियादिल ।
