प्रधानमन्त्रीया निर्वाचनय् ग्वाहालि यानादिसं : पौडेल
नेपाली कांग्रेस पाखें प्रधानमन्त्रीया उम्मेदवार जुयादीम्ह पार्टी संसदीय दलया नेता रामचन्द्र पौडेलं स्वंगूगु चरण प्रधानमन्त्री निर्वाचनय् ग्वाहालि यायेत नेकपा (एमाले)या अध्यक्ष झलनाथ खनालयात इनाप यानादीगु दु ।
निगू चरण तक तटस्थ च्वंगु एमालेया अध्यक्ष खनालया डल्लुइ च्वंगु छेँय् थ्यंकाः पौडेलं मेगू चरणया निर्वाचनया निंतिं समर्थन फ्वनादीगु खः । लिसःलय् अध्यक्ष खनालं शान्ति व संविधानया सुनिश्चितताया लागि राष्ट्रिय सहमतीय सरकारया विकल्प मदुगु धयादिसें राष्ट्रिय सहमतिय सरकार गठन यायेगु पाखे लगे जुइत पौडेलयात इनाप यानादिल ।
अथेहे थौं हे अमेरिकी राजदूत स्कट एच. डेलिसी नं खनालया छेँय् थ्यंकाः खँल्हाबंला यानादीगु दु । वय्कपिं दथुइ सरकार गठन यायेत जुयाच्वंगु निर्वाचन नापं शान्ति प्रकृयाया बारे खँल्हाबंला जूगु खः । राजदूत डेलिसीं याकनं राजनीतिक दलत दथुइ सहमति यानाः सरकार निर्माण यानाः शान्ति प्रकृया क्वचायेके माःगु खँ धयादिल ।
