एमाले बिनाया सरकार दुर्भाग्यपूर्ण : खनाल
नेकपा (एमाले)या अध्यक्ष झलनाथ खनालं एमाले बिनाया सरकार दुर्भाग्यपूर्ण जुइगु खँ धयादीगु दु । सोमवाः येँय् जूगु नेपाल बुद्धिजीवी परिषद्या ज्याझ्वलय् न्ववानादिसें खनालं थःगु पार्टीया समर्थन बिना सरकार गठन जुइमफइगु धयादिसें यदि गठन जुसां अज्याःगु सरकार दुर्भाग्यपूर्ण जुइगु धयादिल ।
एमाले बिनाया सरकार गठन यायेत हाथ्या बियादिसें वय्कलं एमाले तटस्थ च्वनाः देय्यात अनिर्णयया बन्दी दयेकल धाःपिं मिले जुयाः सरकार गठन यायेत एमालें मपंगु धयादिल । नापं वय्कलं १७ गते जुइगु स्वंगूगु चरणया निर्वाचनय् नं एमाले तटस्थ च्वनीगु धयादिल ।
वय्कलं एमालेयात तछ्यायेगु कुतः जुयाच्वंगु धयादिसें अज्याःपिंत निस्तेज यायेगु ख्याच्वः बियादिल । वय्कलं एमालेयात हानं छक बहुमतया कासाय् यंकाः पार्टी तछ्यायेगु कुतः जुयाच्वंगु धयादिल ।
ज्याझ्वलय् एमाले महासचिव ईश्वर पोखरेलं पार्टी केन्द्रीय कमिटीया निर्णय हिलेमफइगु धयादिसें स्वंगूगु चरणया प्रधानमन्त्रीया निर्वाचनय् नं एमालें सुयातं समर्थन मयाइगु धयादिल । वय्कलं पार्टीयात कमजोर यायेगु षड्यन्त्र जुयाच्वंगु धयादिसें अज्याःपिंत निगरानीलय् तयेगु धयादिल ।
