थौं नेपाल बन्दया आंशिक लिच्वः
एकिकृत नेकपा माओवादी विरुद्ध लक्षित याना रिभोलुसनरी लेफ्ट विङ्ग नेकपा एकिकृत जनमोर्चा आदि पार्टीं घोषणा याःगु नेपाल बन्दं थौं जनजीवनय् लिच्वः लाकूगु खनेदु । बन्दं याना सवारी साधनत कम जक लँय् चले जूगु खनेदुसा पसःत धाःसा उलि बन्द जूगु मदु ।
बन्दकर्तातय्सं एबिसि टि.भिया गाडि छगः तछ्याये धुंकूगु दुसा कलंकी सवारी साधनय् अवरोध थनाच्वंगु दु । २०४६ सालय् जूगु जनआन्दोलनय् दक्कले तःधंक आन्दोलन जूगु दिं लुमंके कथं थौं चैत्र २४ गते थ्व बन्दया घोषणा याःगु खः ।
जन आन्दोलनया म्याण्डेट कथं सरकार चलेमजू धकाः एकिकृत माओवादी लिसे विद्रोह यानां वंपिं व माओवादि लिसे जनमोर्चां याःगु एकिकरण मयःपिंसं थ्व बन्द याःगु खः।
लुमंकेबहःजू २०४६ सालय् जूगु दक्कले तःधंगु आन्दोलन चैत्र २४ गते खःसा तात्कालिन राजा विरेन्द्रं चैत्र २६ गते बहुदलया घोषणा यानां कृष्ण प्रसाद भट्टराईयात प्रधानमन्त्री दयेका अन्तरीम सरकारया मन्त्रिमण्डल गठन याःगु खः ।
