३ हजार जनसेना समायोजन यायेगु सरकारया प्रस्ताव
सेना समायोजन व लाडकुतय्त समाजय् पलिस्था यायेगु निंतिं सरकारं लच्छिया कार्ययोजना न्ह्यब्वःगु दु । थ्व स्वयां न्ह्यः स्वलाया कार्ययोजना हःसां नं ई मगाःगु धयादिसें प्रधानमन्त्री लिसें सेना समायोजन विषेश समितिया कजि माधवकुमार नेपालं लच्छिया कार्ययोजना न्ह्यब्वयादीगु खः । गुकिइ अनमिनं योग्य तायेकूपिं झिंगुद्धः जनसेना मध्ये स्वद्व:सित जक समायोजन यायेगु प्रस्ताव या:गु दु ।
एकीकृत नेकपा (माओवादी)या प्रतिनिधिपिं हे मदयेक च्वंगु सेना समायोजन विशेष समितिया बैठकय् प्रधानमन्त्रीपाखें न्ह्यब्वगु उगु कार्ययोजना लच्छिया दुने हे क्वचायेकेगु लक्ष्य तःगु खः । सुरक्षा निकायस समायोजन जुइमास्ति मवःपिं माओवादी जनसेनायात छगू लख न्हय्च्याद्व: निसें निगू त्या लख तकातक ध्यबा बिइगु नं कार्ययोजनाय् प्रस्ताव याःगु दु ।
अथेहे एकीकृत नेकपा (माओवादीं) स्वद्व: जनसेनायात नेपाली सेनाय् समायोजन यायेगु प्रधानमन्त्रीया प्रस्ताव मान्य मजुइगु जानकारी ब्यूगु दु । पोलिटव्युरो बैठकलिपा नायः प्रचण्डं स्वद्वं जनसेना समायोजन यायेगु विशेष समितिया प्रस्ताव न्हिलासुं जाःगु खँ जक जूगु बिचाः प्वंकादिसें वय्कलं माओवादीया समर्थन बिना सेना समायोजन यानाः क्यनेत सरकारयात हाथ्याः नं बियादीगु खः ।
माओवादीया नेतातय् बैठकय् ब्वति मदुगुलिं प्रधानमन्त्रीया प्रस्तावय् निर्णय धाःसा जुइमफुत । पोलिटव्युरो बैठकया हुनिं माओवादी नेतात बैठकय् ब्वति कायेमफुगु खःसा बैठकय् नेपाली कांग्रेस, नेकपा (एमाले), मधेसी जनअधिकार फोरम (लोकतान्त्रिक), मधेसी जनअधिकार फोरम व तराई मधेस लोकतान्त्रिक पार्टीया नेतातय्गु ब्वति दुगु खः ।
सिंहदरबारसं च्वंगु प्रधानमन्त्रीया ज्याकुथिइ स्वघौतक न्ह्याःगु बैठकय् ब्वति दुगु फुक्क दलया शीर्ष नेतातय्सं प्रस्तावय् समर्थन क्यंगु खँ बैठक लिपा एमाले नायः झलनाथ खनालं जानकारी बियादिल । समायोजन जुइगु जनसेनाया ल्याः प्रक्रिया व मापदण्डबारे सहमति जुइमफयेवं विशेष समितिं राजनीतिक दलया शीर्ष नेतातलिसे थौं सहलह याःगु खः ।
