सद्भावनापाखें सरकारयात ब्यूगु समर्थन लितः का:गु बारे संसदय् जानकारी
सद्भावना पार्टी (आनन्दीदेवीं) सरकारयात ब्यूगु समर्थन लितका:गु बारे थौं संसदय् जानकारी ब्यूगु दु । व्यवस्थापिका संसद्या बैठकय् न्वंवानादिसें सद्भावनाया नकिं सरीता गिरीं महोत्तरीया थः कार्यकर्ता रामइकवाल यादवयात स्यातं नं सरकारं स्याम्हेसित मालाः छानबिन यायेत बेवास्ता याःगु धयादिसें समर्थन लितः कयाःगु धयादिल । वय्कलं शान्ति सुरक्षा बिइमफुगु संविधान च्वयेगु व शान्ति प्रक्रियायात गति बिइमफुगुलिं प्रधानमन्त्रीं राजिनामा बिइमाःगु माग नं यानादिल ।
व्यस्थापिका संसद्या थौंया बैठकय् बिचाः तयादीपिं माओवादी सभासद्तय्सं शान्ति सुरक्षा बिइमफुगु व संविधान दयेकेगु ज्याय् सरकार पंगः जूगु बिचाः प्वंकुसें सरकारया राजीनामा फ्वंगु दु । सभासद् कमला रोकां राष्ट्रिय सहमतिया सरकार दयेकाः शान्ति व संविधान च्वयेगु ज्यायात लिच्वलय् थ्यंकेमाःगु धयादीगु खः । इमिसं वर्तमान सरकार ताःमलाःगुलिं नैतिकताया आधारय् राजीनामा बिइमाःगु मागु नं या:गु ख: ।
नेपाली कांग्रेसया दीपकुमार उपाध्यायं गुलिफु उलि याकनं संविधान दयेकेगु निंतिं मुलभुत विषयसं सहमति मालेत मू दलया नेतातय्त इनाप यानादीगु दु । अथेहे एमालेया सभासद् यामलाल कँडेलं शान्ति व संविधानयात लिच्वलय् थ्यंकेत सहमतिया विकल्प मदुगु बिचाः प्वंकादीगु दुसा: नेमकिपाया सुनिल प्रजापितं भ्रष्टाचारया हुनिं घाटाय् वंगु आयल निगमं घाटा पूर्ति यायेत धयादिसें पेट्रोलियम पदार्थया मू थःकाःगु खँय् च्यूताः प्वंकादीगु दु ।
थौंया बैठकय् स्थानीय विकासमन्त्री पुर्णकुमार सेर्मां फोहोरमैला व्यवस्थापन विधेयक २०६६ दथुइ बिचाः यायेमाल धयादिसें सदनय् प्रस्ताव यानादीगु दु । अथेहे मन्त्री सेर्मां जातीय भेदभाव सम्बन्धी विधेयक २०६६ यात दफावार सहलहया निंतिं विधायन समितिइ छ्वयेमाःगु खँय् प्रस्ताव तयादीगु खः ।
