माओवादीं आन्दोलन तच्वयेकीगु
एकीकृत नेकपा माओवादीं राष्ट्रिय सहमतिया सरकार नीस्वनेगु निंतिं संघर्षयात अझ अप्वः तच्वयेकीगु जूगु दु । वर्तमान सरकार शान्ति व संविधानया पंगः जूगु लिच्वः पिकासें माओवादीं आन्दोलन पाखें हे थःगु नेतृत्वय् राष्ट्रिय सहमतिया सरकार नीस्वनेगु लकस तयार जुइगु दाबी याःगु दु ।
थौं क्वचाःगु पोलिटव्युरो बैठकलिपा ग्वसाः ग्वःगु पत्रकार सम्मेलनय् माओवादी नायः पुष्पकमल दाहाल 'प्रचण्डं' शान्ति व संविधान दयेकेगु ज्याय् वर्तमान सरकार ताःमलाःगु धयादिल । आःयात सरकारविरुद्ध अविश्वासया प्रस्ताव मयंकेगु निर्णय यासें माओवादीं थःपिनिगु नेतृत्वय् राष्ट्रिय सरकार नीस्वनेगु निंतिं कुतः न्ह्याकाः च्वनीगु नं जानकारी ब्यूगु दु ।
अविश्वासया प्रस्ताव दर्ता यायेबलय् सभासदपिं न्याये मीगु कासा जुइगु जूगुलिं अविश्वासया प्रस्ताव दर्ता मयायेगु नायः प्रचण्डं धयादिसें आन्दोलनपाखें हे सरकारया हिउपाः हयेगु जानकारी बियादिल । वय्कलं उकिया निंतिं बैशाख ९ गते लेनिन दिवसया लसताय् लाकाः देय्न्यंक राज्यस्तरय् सभा यायेगु व मजदुर दिवसया लसताय् १८ गते येँय् बिशाल जनप्रदर्शन यायेगु बैठकं निर्णय याःगु नापं जानकारी बियादिल ।
कांग्रेस व एमालें सरकार हिउपाःया निंतिं माओवादीयात तःगु प्यंगू शर्तबारे पत्रकारपिनिगु न्ह्यसलय् नायः प्रचण्डं जग्गा जमिनया सम्बन्धय् उच्चस्तरीय आयोग नीस्वनेगु व उकिया सिफारिसय् लितः बिइफइगु व ध्वस्त जूगु छेँया क्षतिपूर्ति बिइगु नापं धयादिल। अथेहे वय्कलं वाईसीएल अर्धसैन्य संरचनाय् मदुगु नं स्पष्ट यानादिल ।
अथेहे माओवादीं वर्तमान सरकार दत्तले संविधान सभाया ई तनेगु निंतिं सहमति मक्यनेगु निर्णय नं याःगु दु ।
क्वःछिनात:गु ई जेठ १४ गते संविधान पिहांमवइगु जुइवं संविधानसभाया ई तनेगु खँय् कांग्रेस व एमाले दुने सहलह न्ह्याःगु इलय् माओवादीं धाःसा क्वःछीनात:गु ई दुने हे संविधान पिथने फइगु बिचाः प्वंकादीगु खः । थौं क्वचाःगु माओवादी पोलिट्व्युरो बैठकं क्वःछीनात:गु ई दुने हे संविधान पिथने फइगु लिच्वः पिथनादिसें संविधानसभाया ई तनेगु विषयसं सहमति मक्यनेगु निर्णय याःगु खः ।
बैठकलिपा नायः प्रचण्डं जेठ १४ दुने हे संविधान पिथनेत सम्भव दुगु धयादिसें माओवादीं संविधानसभाया ई तनेगु त्वहलय् वर्तमान सरकारयात तयातयेगु पक्षय् मदुगु धयादिल । संविधानसभाया ई तनेगु निंतिं निब्वः बहुमत माःगुलिं दकले तःधंगु दल माओवादीया समर्थन अनिवार्य मा: ।
