नेवाः राज्यया निंतिं नेवाःतपाखें व्यापक तयारी
नेवाः स्वायत्त राज्य मंकाः संघर्ष समितिं कन्हय् यलया मंगःबजाःसं सनिलय् तःजिक नेवाः सभा याइगु जूगु दु । ज्यापु समाज यल व नेवाः मुक्ति मंकाः दबूया कजित्वय् जुइगु उगु सभाय् द्वलंद्व: नेवाःतय्सं ब्वतिकाइगु जानकारी ब्यूगु दु ।
उगु सभाय् ज्यापु समाज यलपाखें न्यासःम्ह, नेवाः मुक्ति मंकाः दबूपाखें निसःम्ह, नेवाः राष्ट्रिय मुक्ति मोर्चापाखें स्वसःम्ह, नेपाः लोकतान्त्रिक नेवाः संघपाखें निसःम्ह, नेवाः ल्याय्म्ह न्ह्यलुवाःपाखें सच्छिम्ह अले मेमेगु यलया नेवाः खलः पुचःपाखें नेवाःत अन मुंकेगु भाला काःगु खः । उगु सभाय् नेवाः न्ह्यलुवातय्सं वइगु बैशाख १४ गते नेवाः स्वायक्त राज्य मंकाः संघर्ष समितिपाखें क्वःछिनातःगु संविधानसभा घेराउ ज्याझ्वः छाय् ताःलाकेमाःगु नापं नेवाःतय्गु भूमिकाया बारे न्वंवानादीगु जानकारी ब्यूगु दु ।
क्वःछिनातःगु इलय् हे न्हूगु संविधान जारी यायेत व नेवाः स्वायत्त राज्यया निंतिं दबाव बीत नेवाः स्वायत्त राज्य मंकाः संघर्ष समितिं वइगु वैशाष १४ गते संविधानसभा घेराउ यायेगु ज्याझ्व: घोषणा यानातःगु दु ।
उगु घेराउ ज्याझ्वः ताःलाकेत नेवाःतय्सं आपालं तयारी यायेगु झ्वलय् कन्हय् नेवाः स्यनामिया येँ मुँज्या च्वनीगु जूगु दु । अथे हे येँया दथु लागाय् लाःगु येँ महानगरपालिका वडा नं. २२, २४ व २५ गते गजेन्द्रमान मानन्धर, विरेन्द्रभक्त श्रेष्ठ व शेष नारायण महर्जनया कजित्वय् उगु लागाय् नेवाःतय्गु दथुइ छगू तःजिगु मुँज्या नापं यायेत्यंगु जानकारी नेवाः स्वायत्त राज्य मंकाः संघर्ष समितिया नायः सानुराजा शाक्यं बियादीगु दु ।
अथेहे २८ गते येँया क्वने लागाया येँ महानगरपालिका वडा नं. १२, २०, २१ व २३ या नेवाः खलः पुचःया प्रतिनिधितय्त मुंकाः संविधानसभा घेराउ यायेगु ज्याझ्वः ताः लाकेगु नापं नेवाः आन्दोलनया बारे सहलह ब्याकेगु जुइ धकाः नं वय्कलं जानकारी बियादीगु दु ।
