राष्ट्रपति यादव पाखें जानकी मन्दिरया दर्शन
ज्ञानेन्द्र पाखें नं अन हे पूजा
हिन्दु धर्मालम्वीतय् रामनवमी नखःया लसताय् राष्ट्रपति डा. रामवरण यादवं जनकपुरय् च्वंगु जानकी मन्दिरया दर्शन यानादीगु दु । वय्क बुधवाः सुथय् च्यातात्याः इलय् अन थ्यंकाः पूजा यानादीगु खः । गुताः इलय् अन थ्यंकेगु निर्धारित ज्याझ्वः दुगु खःसां वय्क निर्धारित ई स्वयां न्ह्यः हे अन थ्यंकादीगु खः । राष्ट्रपति यादवं जनकी मन्दिरया दर्शन यानादीगु ज्याझ्वः दुगुलिं जनकपुर क्षेत्रय् तःधंगु ल्याख्य् नेपाली सेना, सशस्त्र व जनपथ प्रहरी परिचालन याःगु खः ।
थ्वहे दथुइ पुलांम्ह जुजु ज्ञानेन्द्र शाहं नं रामनवमिया लसताय् जानकी मन्दिरय् वनाः पूजा यानादीगु दु । पूजा सिधेधुंकाः वय्कलं द्यःगलय् उपस्थितत सर्वसाधारणत नाप छुं ई खँल्हाबंला नं यानादीगु खः । उगु इलय् छुं छुं पुलांपिं मन्त्री व सर्वसाधारणतय् भीडं 'हिन्दू राज्य कायम या' धकाः नाराबाजी नं याःगु खः ।
