निन्हुया न्हि नं आकस्मिक सेवा बन्द, वार्ता विफल
चिकित्सकय् आन्दोलनया कारणं देय्या दकलय् तःधंगु शिक्षण अस्पतालय् आकस्मिक सहितया दक्वं सेवा बन्द जूगु दु । चिकित्सक व विद्यार्थीया आन्दोलनया कारणं झिछन्हु न्ह्यः निसें अनया सेवा ठप्प जुयाच्वंगु दु । बहिरंग सेवा जक बन्द याना: आन्दोलनय् कुहांव:पिं चिकित्सक व विद्यार्थीतय्सं मंगलवाः निसें आकस्मिक सेवा नं बन्द या:गु ख: ।
शिक्षण अस्पतालय् जुयाच्वंगु आन्दोलनया कारणं तःधंगु ल्याख्य् बिरमीत प्रभावित जूगु दु । देय् थीथी थासं वासः याकेत अन थ्यंकूपिं बिरामीत वासः याके मखनाः अथें लिहांवनेमाःगु दु । आन्दोलनया कारणं न्हूपिं बिरामी लगायत आन्दोलन शुरु जुइ न्ह्यः हे भर्ना जूपिं बिरामीत नं प्रभावित जूगु दु ।
थ्वहे दथुइ व्यवस्थापन पक्ष व चिकित्सकत दथुइ बुधवा: जूगु वार्ता असफल जूगु दु । वार्ताय् व्यवस्थापन पक्षं स्नातकोत्तर तहया प्रवेश परिक्षाय् अनियमितता जूगु स्वीकार यासां उकीया जिम्मा मका:गुलिं वार्ता असफल जूगु खँ धा:गु दु ।
चिकित्सक व विद्यार्थीतय्सं स्नातकोत्तर तहया प्रवेश परिक्षाय् अनियमितता जूगु, विवादस्पद परिक्षा रद्द यायेमाःगु, अनियमितता याःगु द्वपं लाःपिं डिन व सहायक डिनया राजीनामा माग तया आन्दोलन यानाच्वंगु दु ।
