बाँकेया प्यंगू थासय् बर्ड फ्लु

बाँके जिल्लाया थीथी प्यंगू थासय् बर्ड फ्लु खनेदुगु दु । बाँकेया राप्तीपारी च्वंगु बिनौना-८ चाचरफर्का, कोहलपुर-४ चपरगौडी, फत्तेपुर गाविसया छटकपुर व नेपालगञ्ज नगरपालिका-७ फुल्टेक्राय् बर्ड फ्लुया जिवाणु लूगु खँ जिल्ला पशु सेवा ज्याकू बाँकें धाःगु दु ।

बाँकेया प्यंगू थासय्या सत्याः खा व हेँय् सीवं नमूना परीक्षणया निंतिं येँया केन्द्रीय पशु अन्वेषण प्रयोगशालाय् छ्वःगु व परीक्षणया रिपोर्टय् बर्ड फ्लु रोग पुष्टि जूगु खँ पशु सेवा ज्याकूथीं धाःगु दु । केन्द्रं मंगलवाः बर्ड फ्लु जूगु पुष्टि याःगु खः ।

थ्वहे दथुइ बर्ड फ्लु रोग खनेवं प्रमुख जिल्ला अधिकारी वीरेन्द्र बहादुर बानियाँया अध्यक्षताय् च्वंगु आकस्मिक बैठकं सावधानी नालेगु निर्णय याःगु दु ।