राष्ट्रिय हितया निंतिं इलय् हे संविधान : ठाकुर
तराई मधेश लोकतान्त्रिक पार्टीया अध्यक्ष महन्थ ठाकुरं जनताया आकांक्षा व राष्ट्रिय हितया निंतिं इलय् हे संविधान निर्माण यायेमाःगु खँ धयादीगु दु । संविधान च्वयेत अझ नं निला दनीगुलिं ई तनेम्वाःगु धयादिसें वय्कलं देय्या अवस्था तसकं तरल व संकटपूर्ण जूगुलिं वर्तमान परिस्थितिइ संविधान निर्माणया निंतिं छप्पँ जुइत दक्वसितं इनाप यानादिल ।
पार्टीया ज्याझ्वलय् ब्वति कायेत पूर्वाञ्चल थ्यंकादीम्ह ठाकुरं मंगलवाः विराटनगरय् राससनाप खँल्हाबंला यानादिसें पुलांम्ह प्रधानमन्त्री गिरिजाप्रसाद कोइरालाया निधनं नेपाःया राजनीतिइ तःधंगु क्षति जूगु धयादिसें मदुम्ह कोइरालाया इच्छा पूवंकेत निगूगु पुस्ताया नेतात इमानदारीपूर्वक न्ह्यावनेमाः धयादिल ।
अथेहे वय्कलं मेगू छगू प्रशंगय् तमलोपा वर्तमान सरकार क्वथलेगु पक्षय् मदुगु धयादिसें आः सरकार क्वथलेगुया छुं अर्थ मदुगु धयदिल । नापं वय्कलं न्हापा सरकारं मधेशी दलत नाप याःगु च्यागू बुँदे सम्झौता पूवंकेमाःगु माग यानादिसें माग पूरा मजुसाः न्हूगु संविधान स्वीकार्य मजुइगु धयादिल ।
