पत्रकारतय्त याःगु आक्रमण प्रति सरकारी दृष्टिकोण माग
संचार नाप सम्बन्धित थीथी न्यागू संगठनं जनकपुरया पत्रकारतय्त याःगु आक्रमण प्रति सरकारया धारणा माग याःगु दु ।
थीथी न्यागू संगठनं मंगलवाः छगू मंकाः विज्ञप्ति पिथनाः पत्रकारतय्त राज्यं नृशंस आक्रमण यागुलिं अपराधीतय् संरक्षण स्वयम् सरकारं हे यानाच्वंगु ठहर याःगु दु । नापं विज्ञप्तिइ उगु घटनाया नैतिक जिम्मेवारी सरकारं हे काये माःगु माग याःगु दु ।
विज्ञप्तिइ घटनाया दोषीतय्त तत्काल कानुनी कारवाही व घटनाया सम्बन्धय् स्वतन्त्र छानविनया माग यायेगु नापं पत्रकारतय्त जुयाच्वंगु श्रृंखलावद्ध आक्रमण मदीकुसाः कडा संघर्षय् वनेगु ख्याच्वः नं ब्यूगु दु ।
क्रान्तिकारी पत्रकार संघया अध्यक्ष महेश्वर दाहाल, नेपाल प्रेस युनियनया महासचिव विन्दुकान्त घिमिरे, प्रेस चौतारीया उपाध्यक्ष राजेन्द्र अर्याल, मधेशी पत्रकार समाजया वरिष्ठ उपाध्यक्ष सुनिल रञ्जन सिंह व व्रोडकाष्टिङ एसोसियसनया अध्यक्ष विष्णुहरी ढकालं उगु मंकाः विज्ञप्ति पिथंगु खः ।
वंगु शुक्रवाः जनकपुरय् बलात्कार सम्बन्धी घटनाया विरोधया समाचार संकलन यायेत वंपिं संचारकर्मीतय्त प्रहरीं आक्रमण याःगु इलय् बागू दर्जन घाःपाः जूगु खः । उपिं मध्य गम्भीर घाःपाः जूपिं न्याम्ह पत्रकारतय्त येँया कान्तिपुर अस्पतालय् वासः याकातःगु दु ।
