भारतीय नेतातय्सं प्रम व सभामुख नापलात
मदुम्ह पुलांम्ह प्रधानमन्त्री गिरिजाप्रसाद कोइराला प्रति श्रद्धाञ्जली देछायेत नेपाः झायदीम्ह भारतीय विदेशमन्त्री एसएम कृष्णा, अर्थमन्त्री प्रणव मुखर्जी व लोकसभाया अध्यक्ष मीरा कुमारं प्रधानमन्त्री माधवकुमार नेपाल व संविधानसभा अध्यक्ष सुवासचन्द्र नेम्वाङयात नापलाना खँल्हाबंला याःगु दु ।
कोइरालायात श्रद्धाञ्जली देछाये धुंकाः भारतीय नेतातय्सं प्रधानमन्त्री नेपालयात नापलासें कोइरालाया निधन प्रति दुःख प्वंकूगु खः । नापं थुगु इलय् नेपाली जनतां धैर्य धारणा यानाः न्ह्यावनेफेमाः धकाः कामना याःगु खः ।
अथेहे खँल्हाबंलाय् वय्कपिंसं नेपाःया शान्ति प्रकृया प्रति च्यूताः प्वंकूसें संविधान निर्माण प्रकृयां गति काइगु विश्वास प्वंकूगु दु । उगु इलय् प्रधानमन्त्री नेपालं कोइरालाया आकांक्षा कथं शान्ति प्रकृया व संविधान निर्माणयात इलय् हे क्वचायेकीगु धयादिल ।
थौं हे भारतीय नेतातय्सं संविधानसभा अध्यक्ष नेम्वाङ नाप नं खँल्हाबंला यासें शान्ति प्रकृया व संविधान निर्माणया बारे च्यूताः प्वंकूगु दु ।
