जनकपुरय् प्रहरीया लाठीचार्जं आपालं घाःपाः
जनकपुर रेल्वे स्टेशन प्रहरी चौकीया सव ईन्सपेक्टर बाबुराम झां छम्ह मिसायात बलत्कार याःगु विरोधय् आइतवाः न्हिछि हे जनकपुरय् जुलुस प्रदर्शन जूगु दु । अन थीथी पार्टी सम्बध कार्यकर्ता नापं सर्वसाधारणं पिकाःगु जुलुसय् प्रहरीं लाठीचार्ज या:गु इलय् न्याम्ह संचारकर्मी नापं आपलं प्रदर्शनकारीत घाःपाः जूगु दु ।
प्रहरी उपरीक्षक श्याम खड्काया निर्देशनय् जूगु लार्ठीचार्जय् लानाः गम्भीर घाःपाः जूम्ह पत्रकार सुरेश कुमार यादवयात थप वासः याकेत येँय् हःगु दु । अथेहे प्रहरीया लाठीचार्जय् लानः घाःपाः जूपिं न्यय्म्ह स्वयां अप्वः प्रदर्शनकारीतय्त धनुषा नर्सिंग होम, केयर नर्सिंग होम व जनकपुर अञ्चल अस्पतालय् वासः याकातःगु दु ।
प्रहरीं लाठीचार्ज यायेवं जूगु तनाव नियन्त्रणय् कायेत प्रहरीं छुं राउण्ड हवाई फायर नं याःगु खः । आः अन नेपाल प्रहरी व सशस्त्र प्रहरीया उपस्थिति अप्वयेकूगु दु ।
थ्वहे दथुइ बलत्कारया द्वपं लाम्ह सव ईन्सपेक्टर बाबुराम झायात प्रहरी प्रधान ज्याकूथीं निलम्बन याःगु दु ।
