भारतीय नेतातय्सं कोइराला प्रति श्रद्धाञ्जली देछात
भारतीय विदेशमन्त्री एसएम कृष्णा, अर्थमन्त्री प्रणव मुखर्जी व लोकसभाया अध्यक्ष मीरा कुमारं मदुम्ह गिरिजाप्रसाद कोइराला प्रति श्रद्धाजली देछानादीगु दु । आइतवाः न्हिनय् झिंनिताः इलय् नेपाः थ्यंकादीपिं भारतीय नेतात विमानस्थलं सुजाता कोइरालाया मण्डिखाटारय् च्वंगु छेँय् वनाः शोकपुस्तीकाय् हस्ताक्षर यानादीगु खः ।
अन लिपाः वय्कपिं येँया दशरथ रंगशाला थ्यंकाः कोइरालाया सिम्ह प्रति श्रद्धाञ्जली प्वंकादीगु खः । वय्कपिंसं आर्यघाटय् जुइगु कोइरालाया अन्त्यष्टिइ ब्वति काइगु ज्याझ्वः नं दु ।
अथेहे भारतीय राष्ट्रवादी कांग्रेसया महामन्त्री डीबी त्रिपाठी दशरथ रंगशाला वनाः कोइराला प्रति श्रद्धाञ्जली देछानादीगु दु । वय्कलं कोइराला नेपाः व भारतया निंतिं जक मखसें दक्षिण एसीया हे मार्ग दर्शक नेता जूगुलिं दक्षिण एसीयाया निंतिं तःधंगु क्षति जूगु धयादिल । नापं वय्कलं कोइराला मदुगुलिं भारत शोकाकुल जूगु नं धयादिल ।
