द्वलंद्वं मनूत पाखें कोइराला प्रति अन्तिम श्रद्धाञ्जली
नेपाःया पुलाम्हं राष्ट्राध्यक्ष व पुलांम्ह प्रधानमन्त्री गिरिजाप्रसाद कोइराला प्रति अन्तिम श्रद्धाञ्जली देछायेत द्वलंद्वं मनूत येँया दशरथ रंगशालाय् थ्यंकूगु दु ।
शनिवाः न्हिनय् मदुम्ह कोइरालायात अन्तिम श्रद्धाञ्जली देछायेत प्रधानमन्त्री माधवकुमार नेपाल, उपप्रधानमन्त्री सुजाता कोइराला, कांग्रेसया कार्यवहाक सभापति सुशील कोइराला, वरिष्ठ नेता शेरबहादुर देउवा, संसदीय दलया नेता रामचन्द्र पौडेल, माओवादी अध्यक्ष पुष्पकमल दाहाल 'प्रचण्ड' लगायत नेतात नापं विदेशी कुटनिटिक नियोगया अधिकारीत सहित आपालं मनूत दशरथ रंगशालय् थ्यंकेगु क्रम न्ह्यानातुं च्वंगु दु ।
श्रद्धाञ्जलीया निंतिं रंगशाला थ्यंकादीम्ह प्रधानमन्त्री नेपालं कोइरालाया सिम्हय् नेपाःया राष्ट्रिय ध्वाँय् फाय्काः सम्मान यानादीगु खःसा कांग्रेसया नेतातय्सं कांग्रेसया ध्वाँय् फाय्कूगु खः । पुलाम्ह राष्ट्राध्यक्ष जूगुलिं सरकारं राजकीय सम्मान सहित वय्कयात अन्तिम श्रद्धाञ्जलीया व्यवस्था यानातःगु दु ।
मदुम्ह कोइरालाया सिम्ह रंगशाला यंके न्ह्यः कांग्रेसया पार्टी ज्याकू सानेपाय् झिन्यागू मिनेट तःगु खः ।
