कोइरालाया राष्ट्रिय सम्मान सहित अन्त्यष्टि याइगु
सरकारं नेपाली कांग्रेसया सभापति गिरिजाप्रसाद कोइरालायात राष्ट्रिय सम्मान सहित अन्त्यष्टि यायेगु निर्णय याःगु दु । शनिवाः सुथय् उपप्रधानमन्त्री सुजाता कोइरालाया मण्डिखाटारय् च्वंगु छेँय् च्वंगु मन्त्रिपरिषद्या बैठकं थ्व निर्णय याःगु खः ।
अथेहे बैठकं मदुम्ह कोइरालाया सम्मानय् स्वन्हु तक राष्ट्रिय ध्वाँय् बछि क्वछुइकेगु निर्णय नापं आइतवाः सार्वजनिक बिदा बीगु निर्णय याःगु खः ।
थ्वहे दथुइ एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' छगू पत्रकार सम्मेलन यानाः कांग्रेस सभापति कोइराला मदुगु प्रति दुःख प्वंकादीगु दु । वय्कलं दक्वं पक्षय् मिले जुयाः शान्ति प्रकृया व संविधान निर्माण यायेगु ज्या लगे जुसाः मदुम्ह कोइराला प्रति सम्मान जूगु धयादिल ।
अथेहे नेकपा (एमाले)या अध्यक्ष झलनाथ खनालं नं कोइराला मदुगु प्रति सम्वेदना प्वंकादीगु दु । शनिवाः येँय् जूगु छगू ज्याझ्वःया दथुइ खनालं कोइराला मदुगु प्रति सम्वेदना प्वंकादीगु खः ।
