पुलाम्ह प्रम गिरिजाप्रसाद कोइराला मंत
नेपाल कांग्रेसया सभापति नापं पुलाम्ह प्रधानमन्त्री गिरिजाप्रसाद कोइराला शनिवाः न्हिनसिया १२:११ बजे मंत । छुं ई न्ह्यः निसें स्वँय् समस्या जुयाः उसाँय् मदुम्ह कोइरालाया अवस्था बिहीवाः बहनी निसें चिन्ताजनक जूगु खः ।
च्यय्न्हय्दँ दुम्ह कोइरालायात म्ह्याय् उपप्रधानमन्त्री सुजाता कोइरलाया छेँय् हे अस्पतालया थें सुविधा साधन बिया वासः याकातःगु खः । वय्कयात अन्तिम श्रद्धाञ्जली बीत प्रधानमन्त्री माधवकुमार नेपाल नापं सभामुख सुवासचन्द्र नेम्वाङ लगायत आपालं राजनीतिक ख्यःया व्यक्तित्व, कांग्रेसया नेता, कार्यकर्ता नापं शुभेच्छुकत मंडीखाटारय् च्वंगु सुजाता कोइरालाया छेँय् थ्यंकूगु खः ।
कोइराला मदेय्वं च्वंगु कांग्रेस केन्द्रीय कार्यसमितिया बैठकं सभापति कोइराला मदुगु अनुमोदन यासें आइतवाः सुथय् च्याताः इलं निसें वय्कयात अन्तिम श्रद्धाञ्जलीया निंतिं येँया त्रिपुरेश्वरय् च्वंगु दशरथ रंगशालाय् तयेगु व निता: इलंनिसें शवयात्रा यायेगु निर्णय याःगु दु ।
मदुम्ह कृष्णप्रसाद कोइराला व वय्कया कान्छीम्ह जहान दिव्या कोइराला पाखें विक्रम सम्वत् १९८१य् भारतया बिहार राज्यया टेडीलय् गिरिजाप्रसाद कोइरालाया जन्म जूगु दु । २००४ सालय् विराटनगरय् मजदुर आन्दोलन पाखें नेपाली राजनीतिइ प्रवेश यानादीम्ह कोइराला न्याक्वः तक नेपाःया प्रधानमन्त्री जुयादीगु खः ।
