सम्पत्ति लित बीधुंका: जक संविधान : देउवा
नेपाली कांग्रेसया वरिष्ठ नेता शेरबहादुर देउवां माओवादीं कब्जा यानातःगु सम्पत्ति लित मब्यूतल्ले न्हूगु संविधान जारी मजुइगु खँ धयादीगु दु ।
शुक्रवाः सिन्धुलीइ कांग्रेस अगुवा कार्यकर्ता भेलायात सम्बोधन यानादिसें वय्कलं कब्जा यानातःगु सम्पत्ति लितबीमाःगु नापं सेना समायोजन व वाईसीएलया अर्धसैनिक संरचना भंग मजुइकं न्हूगु संविधान जारी जुइमफइगु दाबी यानादिल ।
शान्ति स्थापनाया निंतिं माओवादी जिम्मेवार मजूगु द्वपं बियादिसें नेता देउवां माओवादीं बृहत शान्ति सम्झौता पालना यानाः चैत दुने सेना समायोजन, कब्जा यानातःगु सम्पत्ति लितबीगु व वाईसीएलया अर्धसैन्य संरचना भंग याःसा इलय् हे संविधान जारी जुइफइगु धयादिल ।
पुलांम्ह प्रधानमन्त्री नं जुयादीम्ह देउवां कांग्रेसया महाधिवेशनय् सभापति पदया निंतिं थम्हं उम्मेदवारी बीगु संकेत यानादिसें पार्टी दुने दक्वसितं बराबर सम्मान व न्याय बीगु धयादिल ।
