नेपाल लिपियात युनिकोडय् यंकेगु मुँज्या
येँ (सन्ध्या टाइम्स)/नेपाल लिपियात युनिकोडय् यंकाः अन्तर्राष्ट्रिय मान्यता कायेगु बारे सहलह यायेत कन्हय् येँय् छगू विशेष अन्तर्क्रिया ज्याझ्वः जुइत्यंगु दु ।
नेपाल लिपि गुथिया ग्वसालय् जुइगु उगु ज्याझ्वलय् नेपाः बाहेक विश्वया थीथी देशय् च्वंपिं लिपि सम्बन्धी विशेषज्ञतय्सं नं ब्वति काइगु खँ सीदुगु दु। ज्याझ्वलय् जापानया छुकुबा विश्वविद्यालयया मानवशास्त्र विभागया नायः डा. क्यारोल फा से नापं नेपाः वयाच्वंपिं विदेशया भिजिटिङ प्रोफेसरतय्सं ब्वति काइगु खँ धाःगु दु ।
लिसें नेपालय् च्वनाः लिपि सम्बन्धी ज्या यानाच्वंपिं विदेशी भिजिटिङ प्रोफेसरतय्सं नं ब्वति काइगु खँ धाःगु दु ।
थ्व ज्याय् सफलता चूलात कि नेपाल लिपियात अन्तर्राष्ट्रिय रुपय् मान्यता चूलाई। इन्टरनेट चले याइपिं फुक्क नेवाःतय् थुकिं अःपुका बी। थुकिया निंतिं वंगु ताःई न्ह्यवंनिसें कुतः जुयाच्वंगु खःसां उकी पूर्ण रुपं सफलता धाःसा चूलाके फयाच्वंगु मदुनि ।
थुगुसी थुकियात ताःलाकेगु हे ताः तयाः थुगु गोष्ठीया ग्वसाः जुयाच्वंगु खः ।
