निगू मधेशी पार्टी तज्यायेफु
येँ (सन्ध्या टाइम्स)/सरकार विरुद्ध अविश्वासया प्रस्ताव यंकेगु धकाः कुतः यानाच्वंगु एनेकपा (माओवादीं) यदि संसदय् थ्व प्रस्ताव यंकल धाःसा थौंकन्हय् माधव नेपालया सरकारयात समर्थन यानाच्वंगु निगू मधेशी पार्टी मधेशी जनअधिकार फोरम (लोकतान्त्रिक) व तमलोपा कुचा जुइगु यक्व सम्भावना दु ।
विज्ञ सूत्रतय्सं बिउगु जानकारी कथं माओवादीं थ्व निगू पार्टी तछ्यानाः उकिया झिम्ह झिम्ह ति सभासद्तय्त थःथाय्पाखे हयाः ३०१ संख्या खाकेगु तयारी यानाच्वंगु दु। थुकिया निंतिं माओवादीं निगुलिं पार्टीय असन्तुष्ट सभासद्तलिसे खँ ल्हायेधुंकूगु दु ।
माओवादी अध्यक्ष प्रचण्डं म्हिगः संविधानसभाय् दुथ्याःगु मेमेगु चिचीधंगु पार्टीतलिसे नं थःपिनि नेतृत्वय् न्हूगु सरकार गठन यायेगु बारे सहलह यानादीगु खः। तर उगु सहलहय् चीधंगु पार्टीतय्सं स्पष्ट बहुमत वइगु खःसा जक माओवादीयात थःपिनि मत बी फइ धकाः संकेत क्यंगु खँ धाःगु दु ।
उखे म्हिगः हे माओवादी अध्यक्ष प्रचण्डं प्रधानमन्त्री माधव नेपालयात वय्कःया कोटेश्वरय् च्वंगु निजी छेँय् नापलासें थःपिं सदनया दकलय् तःधंगु दल जूगु कारणं माओवादीया हे नेतृत्वय् सरकार गठन यायेगु वातावरण दयेका बियादिसँ धकाः इनाप यानादीगु खँ सीदुगु दु। उगु इलय् प्रम नेपालं अविश्वासया प्रस्ताव हयाः थःगु सरकार क्वःथलादिसँ अले थःपिनि हे नेतृत्वय् न्हूगु सरकार दयेकादिसँ धकाः लिसः बियादीगु खँ नं धाःगु दु ।
