बस दुर्घटनाय् सीपिनि ल्या स्वीछम्ह थ्यन
कालीकोटं सुर्खेत वयाच्वंगु बस दुर्घटनाय् लानाः सीपिनि ल्या स्वीछम्ह थ्यंगु दु । सीपिं मध्ये नीन्याम्हेसिया जक सनाखत जूगु दु । दैलेखया पिपलकोट गाविसय् च्वंगु कैतु धाःगु थासय् ना. ३. ख. ५८६८ नम्बरया बस कार्णाली खुसीइ कुतुवना छखाः हे छेँया स्वम्ह नं सीगु दु ।
बिहीवाः सुथय् कालीकोटया सदरमुकाम मान्मापाखें बस न्ह्याःगु इलय् स्वीप्यम्ह यात्रुत जक दुगु खःसां दुर्घटना जूगु इलय् न्हय्म्ह स्वयां अप्वः यात्रुत बसय् दुगु खँ धाःगु दु । बसय् क्षमता स्वयां अप्वः यात्रुत दुगुलिं बस अन्यन्त्रित जुयाः दुर्घटना जूगु खँ प्रहरीं धाःगु दु ।
दुर्घटनाय् लानाः झिंनिम्ह घाःपाः जूगु दुसाः घाःपाः मध्ये झिम्हेसिया अवस्था गम्भीर दु । गम्भीर जूपिं झिम्हेसित हेलिकप्टरय् तयाः कोहलपुर शिक्षण अस्पतालय् यंकूगु खः । अथेहे दुर्घटनाय् लानाः बेपत्ता जूपिनि ल्या अझ यकिन जुइमफुनीगु खँ धाःगु दु ।
