लडाकु समायोजनय् ग्वाहालि यायेत प्रमया इनाप
प्रधानमन्त्री माधवकुमार नेपालं माओवादी अध्यक्ष पुष्पकमल दाहाल 'प्रचण्ड'यात लडाकु समयोजनय् ग्वाहालि यायेत इनाप यानादीगु दु । वय्कलं लडाकु समायोजन मजुइकं मेगू छुं नं प्रकृया पूवने मफइगु धयादिसें लडाकु समयोजनय् ग्वाहालि यायेत इनाप यानादीगु खः ।
बिहीवाः सुथय् प्रधानमन्त्रीया निजी निवास कोटेश्वरय् जूगु खँल्हाबंलाय् लडाकु समायोजन बाहेक राष्ट्रिय सहमति निर्माणया विषलय् खँल्हाबंला जूगु खः । खँल्हाबंलाय् माओवादी अध्यक्ष प्रचण्डं इलय् हे संविधान निर्माण यायेत व शान्ति प्रकृयायात तार्किक निष्कर्षय् थ्यंकेत राष्ट्रिय सहमति आवश्यक जूगु धयादीगु खसाः लिसलय् प्रधानमन्त्री नेपालं थुकीया निंतिं दक्वं पक्ष गम्भीर जुइमाःगु धयादिल ।
निम्ह नेतात दथुइ पीन्यागू मिनेट जूगु खँल्हाबंलाय् जेठ १४ गते दुने संविधान निर्माण मजुसाः छु यायेगु धकाः खँल्हाबंला जुसां इलय् हे संविधान निर्माण यायेत वातावरण दयेकाः न्ह्याः वनेमाःगु खँय् सहमति जूगु खँ माओवादी अध्यक्ष प्रचण्डं कनादिल ।
