कर्णालीलय् बस कुतुवन, झिंच्याम्ह सित
कालिकोटं सुर्खेत पाखे वनाच्वंगु ना. ३. ख. ५८६८ नम्बरया बस बिहीवाः सुथय् कर्णाली खुसीइ कुतुवना झिंच्याम्ह सीगु दु । अन बस कुतुवना सीपिं मध्ये झिम्ह मिजं, प्यम्ह मिसा व प्यम्ह मस्त जूगु खँ धाःगु दु । दुर्घटनाय् लानाः सिपिं स्वम्हेसिया जक सनाखत जूगु व मेपिं झिप्यम्हेसिया नां पुष्टि मजूनिगु खँ धाःगु दु ।
काँक्रेबिहार यातायात व्यवसायी समितिया यात्रुवाहक बस दुर्घटनाय् लानाः घाःपाः जूपिं झिंनिम्ह यात्रुतय्त उद्धार याःगु व उपिं मध्ये झिम्हेसिया अवस्था गम्भीर दुगु खँ प्रहरीं धाःगु दु । घाःपाः जूपिनि नं नां सिकेमफुनीगु खँ प्रहरीं धाःगु दु ।
दैलेखया पिपलकोट गाविसया कैतु धाःगु थासय् बस सतकं १५० मिटर क्वये कुतुवंगु खः । स्वीम्ह स्वयां अप्व यात्रुत दुगु उगु बस दुर्घटना जुइवं खुम्ह बसं तिन्हुया ज्यान जोगे यायेत सफल जूगु दुसाः झिंछदँया मचायात नं जिवित हे उद्धार याःगु दु ।
उद्धारया नितिं आ: दैलेख, अछाम व कालिकोटं सुरक्षाकर्मीत दुर्घटनास्थलय् थ्यंगु दुसा: उद्धारया निंतिं सुर्खेतं हेलिकप्टर नं छ्वःगु दु ।
