'कांग्रेस जातीय अग्राधिकारया विपक्षय्'
नेपाली कांग्रेसया उपसभापति रामचन्द्र पौडेलं कांग्रेस म्हो जक प्रदेश दुगु राज्य पुनर्संरचनाया पक्षय् दुगु खँ धयादीगु दु ।
राज्य पुनर्संरचना बारे कांग्रेसया आधिकारीक धारणा दयेकेत बुधवाः च्वंगु बैठक लिपाः पत्रकारत नाप खँल्हाबंला यानादिसें वय्कलं कांग्रेसया पदाधिकारीत दथुइ म्हो जक प्रदेश सहितया राज्य पुनर्संरचनाया खाका न्ह्यब्वयेगु सहमति जूगु कनादिल ।
व्य्कलं प्रदेशत बहुभाषीक, बहुधार्मीक, बहुसांस्कृतिक जुइमाःगु धयादिसें राज्य पुनर्संरचनाय् भूगोल, आर्थिक विषयलय् नं ध्यान बीमाःगु धयादिल । प्रदेशत जातीय आधारय् निर्माण यायेमज्यूगु धयादिसें नेता पौडेलं प्रेदशयात जातीय अग्राधिकार बीमज्यूगु धयादिल । वय्कलं संविधानसभाया राज्य पुनर्संरचना समितिं पेश याःगु झिंप्यंगू प्रदेशया खाका कांग्रेसयात मान्य मजूगु नं धयादिल ।
संविधानसभाया राज्य पुनर्संरचना समितिलय् कांग्रेसं आः तक राज्य पुनर्संरचनाया खाका न्ह्यब्वये मफुनी । कांग्रेंस उपसभापति गोपालमान श्रेष्ठया संयोजकत्वय् गठन जूगु पार्टीया राज्य पुनर्संरचना समितिं न्हय्गू प्रदेश दुगु खाका तयार यासां पार्टी दुने सहमित मजुइवं समिति पाखें उगु खाका पारित जुइमफुगु खः ।
