बस दुर्घटनाय् छम्ह सित, आपालं घाःपाः

नेपालगञ्जं कैलालीया टीकापुरपाखे वनाच्वंगु छगः यात्रुबहाक बस बुधवाः न्हिनय् कौलालीया लम्की-टीकापुर सतकखण्डय् दुर्घटना जुयाः छम्ह सीगु दुसा: स्वीखुम्ह घाःपाः जूगु दु । घाःपाः जूपिं मध्ये न्याम्हेसिया अवस्था गम्भीर जूगु खँ धाःगु दु । दुर्घटनाय् लानाः सुर्खेत छेँ जूम्ह झिंन्हय्दँया खलासी मनोज लामा सीगु खँ लम्की प्रहरीं धाःगु दु ।

भे. १. ख. ७६० नम्बरया बस लम्की बजार स्वयां बागू किलोमिटर न्ह्यने लाःगु टीकापुर सतकखण्डय् न्हिनय् छता इलय् दुर्घटना जूगु खः । बसय् क्षमता स्वयां अप्वः यात्रुत तयाहःगुलिं दुर्घटना जूगु खँ धाःगु दु । दुर्घटनाय् घाःपाः जूपिं मध्ये झिंनिम्हसित बाँकेया कोहलपुर मेडिकल कजेल व मेपिं नीप्यम्हेसित लम्कीया लालरत्न व शितल मेडिकल हलय् वासः याकातःगु दु ।