थँहिति मानन्धरया साः बुसादँ
येँ (सन्ध्या टाइम्स)/थँहिति मानन्धर गुथिया साः बुसादँ साःद्यः पुज्यानाः न्यायेकल। साःद्यः पुज्याःबलय् दापागुरु पुष्पकुमार (नाति) मानन्धरया संयोजकत्वय् दाफा नं थाःगु खः। गुथिया नायः तुल्सीकृष्ण मानन्धरया सभापतित्वय् जूगु उगु ज्याझ्वलय् न्वकु लक्ष्मीदास मानन्धरं लसकुस यानादीगु खः ।
ज्याझ्वलय् मूपाहां सभासद् हिसिला यमिं लुम्बिनी विश्वविद्यालयया न्हूम्ह उपकुलपति डा. त्रिरत्न मानन्धरयात हनादीगु खः। लिसें वय्कलं नाय्खिं बाजंया सुनिल मानन्धर व धाः बाजंया सरोज मानन्धरयात 'हामू हरिदास सिरपाः' नं लःल्हानादिल ।
ज्याझ्वलय् नेवाः स्वायत्त राज्य बारे मू पाहां यमि नापं सभासद्पिं डा. मंगलसिद्धि मानन्धर, तीर्थराम डंगोल, बुद्ध साय्मि, धर्मोदय सभाया महासचिव सुचित्रमान शाक्यपिंसं नुगःखँ प्वंकादीगु खः। वय्कलं संविधानसभां प्राप्त जुइगु नेवाः स्वायत्त लागाया रक्षा यायेमाःगु लिसें नेपाःयात हानं हिन्दू राष्ट्र दयेकेमाः धकाः अभियान न्ह्याकाच्वंपिनि प्रतिकार यायेमाःगु बारे नं थःपिनि बिचाः कनादीगु खः।
छ्यांज्ये गौतम मानन्धरं सुभाय् देछानादीगु उगु ज्याझ्वलय् देवदास मानन्धरया संयोजकत्वय् गुथिया ख्वाःपौ नं पिथंगु खः ।
