नेप्से सामान्य अंकं क्वय्
येँ (सन्ध्या टाइम्स)/ नेपाल स्टक एक्सचेन्जय् मंगलवाःया शेयर कारोबारय् नं नेप्से परिसुचक कुहां वःगु दु। वंगु छुं दिं न्ह्यःया तुलनाय् म्हिगःया कारोबारय् धाःसा तसकं म्हो शुन्य दशमलव ७ अंकं कुहां वयेवं समग्र शेयर बजाःया कारोबार मापन याइगु नेप्से ४८० दशमलव ४९ अंकय् थ्यंगु दु ।
थ्वकुन्हुया कारोबार वाणिज्य बैंक, विकास बैंक जल विद्युत व फाइनान्स समुहया कारोबार कुहां वःगु दुसा बिमा समुह छगू जक १ दशमलव ३९ अंकं थहां वंगु दु ।
मंगलवाःया शेयर कारोबारय् ख्वीस्वंगू कम्पनीया छगू लख स्वद्वः व स्वसः व चय् छगू कित्ता शेयर न्याये-मी जुयाः स्वंगू करोड पीछगू लख नीछद्वः तका दांया कारोबार जूगु दु।
कारोबार कम्पनी मध्ये पश्चिमाञ्चल फाइनान्सं दकलय् अप्वः कमे याःगु दुसा मितेरी विकास बैंकं दकलय् अप्वः द्यापं फःगु दु। पिपल्स फाइनान्स कम्पनी लिमिटेडं दांया ल्याखं दकलय् अप्वः चय्खुगू लख स्वीस्वद्वः तकाया कारोबार याःगु दु ।
