कोइराला अस्पतालं डिस्चार्ज
प्रचण्डं कोइराला नापलात
उसाँय् मदया प्यन्हु न्ह्यः बाँसबारी च्वंगु सहिद गंगालाल हृदय केन्द्रय् भर्ना जुयादीम्ह नेपाली कांग्रेसया सभापति गिरिजाप्रसाद कोइरालायत बुधवाः अस्पतालं डिस्चार्ज याःगु दु । प्यन्हू न्ह्यः स्वयां वय्कया स्वास्थय अवस्थाय् सुधार जूगुलिं वय्कयता डिस्चार्ज याःगु खँ डाक्टरतय्सं धाःगु दु । वय्कयकत अक्सिजन सहित हे अस्पतालं डिस्चार्ज याःगु खः ।
कोइरालां थःयात याकनं छेँ वनेमाल धकाः अडान कायेवं वय्कया उपचारय् संलग्न डाकटरतय् सहमतिलय् डिस्चार्ज याःगु खः । वय्कयात अझ नं न्हि झिंखुघौ निसें नीप्यघौ तक अक्सिजन बीमाःगु व न्हय्न्हु निसें झिन्हु तक एन्टिवायोटिक बीमानीगु खँ धाःगु दु । अस्पतालं वय्कयात म्हाय् सुजाता कोइरालाया मण्डिखाटारय् च्वंगु छेँय् यंकूगु खः ।
कोइरालायात डिस्चार्ज याये स्वयां न्ह्यः बुधवाः सुथय् माओवादी अध्यक्ष पुष्पकमल दाहाल 'प्रचण्ड' गंगालाल हृदय केन्द्र वनाः वय्कयात नापलानादीगु खः । वय्कपिं दथुइ कोइरालाया स्वास्थ्य व राजनीतिक गतिरोध बारे खँल्हाबंला जूगु खः ।
खँल्हाबंलाय् कोइरालां प्रचण्डयात 'जिम्मेवारी छिगु ब्वलय् वःगु' खँ धयादीगु जानकारी प्रचण्डं बियादिल । अथेहे प्रचण्डं कोइरालाया स्वास्थ्यस्थिति सुधार जुसां पूवंक ठीक मजुइनीगु कनादिल ।
