गभर्नर नियुक्ति जुइमफुत, एमआरपी नं अनिर्णित
मन्त्रिपरिषदया बैठकय् थौं सनिलय् हानं च्वनीगु
ताः ई न्ह्यः निसें सत्तारुढ दलत दथुइ विवाद जुयाः राष्ट्र बैकया गर्भनर पद खाली जुयाच्वंगु बारे निर्णय यायेत बुधवाः सुथय् च्वंगु मन्त्रिपरिषदया बैठकं नं थुकी बारे निर्णय यायेमफुत । अथेहे बैठकं मेसिन रिडेबल पासपोर्ट (एमआरपी) बारे नं छुं निर्णय मयासें क्वचाःगु दु । थुकीया बारे हानं सहलह यायेत बुधवाः सनिलय् हानं मन्त्रिपरिषद्या बैठक च्वनीगु जूगु दु ।
स्वघौ तक न्ह्याःगु मन्त्रिपरिषदया बैठकं बर्दिया राष्ट्रिय निकुञ्जया घटना छानविन यायेत सहमहान्याधिवक्ता सरोजप्रसाद गौतमया नेतृत्वय् निकुञ्ज व रक्षा मन्त्रालयया उपसचिव दुथ्याःगु समिति गठन याःगु दु । नापं घटनाय् सीपिं मनूतय् छेँजःयात नीन्याद्वपं बीगु निर्णय नं याःगु दु ।
अथेहे बैठकं लडाकु रेखदेख व व्यवस्थापन समिति नं गठन याःगु दु । उगु समितिलय् शान्ति व पुननिर्माण मन्त्री रकम चेम्जोङ, उर्जा मन्त्री डा. प्रकाशशरण महत, स्वास्थ्य व जनसंख्या मन्त्री उमाकान्त चौधरी व भौतिक योजना निर्माण राज्य मन्त्री साजय साह च्वनादीगु दु ।
नापं बैठकं प्रहरी नायब महानिरीक्षक पर्शुराम खत्रीयात स्वलाया निंतिं निलम्बन याःगु दु । येँया छगू रेष्टुरान्टय् ल्वाःगु घटनाय् खत्रीं पदीय मर्यादाय् मच्वंगु धासें कारवाही याःगु ख: । उगु घटनाया छानविन यायेत प्रहरी अतिरिक्त महानिरीक्षक रविन्द्रप्रताप शाहया संयोजकत्वय् समिति नं गठन याःगु दु ।
बैठकं ऐतिहासिक जनआन्दोलनय् घाःपाः जूपिंत लाय् बियातःगु निद्वंयात थप यानाः स्वद्वं व निस यायेगु निर्णय याःगु दु । अथेहे शहीदया छेँजःयात बियावयाच्वंगु न्याद्वंलय् झिंनिस थप याःगु दु । बैठकं थ्व निर्णय माघ महिना निसें लागु जुइ कथं ध्यबा उपलब्ध याकीगु खँ धाःगु दु ।
