ल्वाभः व्यवस्थापन लिपाः जक संविधान : देउवा
नेपाली कांग्रेसया वरिष्ठ नेता शेरबहादुर देउवां माओवादी लडाकुतय् समायोजन व ल्वाभः व्यवस्थापन मजुइकं संविधान जारी यायेमफइगु खँ धयादीगु दु । वय्कलं धयादिल, 'लडाकु समायोजन व ल्वाभः व्यवस्थापन मजूतल्ले संविधान जारी यायेगु वेकार जुइ ।'
मंगलवाः सिमरा विमानस्थलनय् पत्रकारत नाप खँल्हाबंला यानादिसें नेता देउवां चैत दुने लडाकु समायोजन व ल्वाभः व्यवस्थापन यानाः ल्यँ दनीगु इलय् न्हिचाः ज्या यानाः इलय् हे संविधान निर्माण यायेफइगु धयादिल ।
सर्लाहीलय् मंगलवाः जुइगु कार्यकर्ता भेलायात सम्बोधन यायेत बाराया सिमरा थ्यंकादीम्ह नेता देउवां माओवादीं चाहे जूसाः इलय् हे संविधान जारी जुइगु धयादिल । संविधान इलय् हे जारी यायेगु वा मयायेगु खँ माओवादीया ज्याखँय् निर्भर जुइगु धयादिसें वय्कलं माओवादी सकारात्कम जुसाः जेठ १४ हे संविधान जारी जुइगु धयादिल ।
नेपाली कांग्रेस वर्तमान सरकार परिवर्तनया पक्षय् मदुगु धयादिसें नेता देउवां थ्वहे सरकारं संविधान जारी याइगु धयादिल । वय्कलं माओवादी हइगु धाःगु अविश्वासया प्रस्ताव हल्ला जक जूगु दाबी यानादिसें माओवादी दुने हे अविश्वास प्रस्ताव ह्येगु बारे छगू मत मदुगु दावी यानादिल ।
