'सेनां नियन्त्रणय् कयाः हत्या'
बर्दिया राष्ट्रिय निकुञ्जया वाँसपानी कालिकास्थान जंगलय् नेपाली सेनाया गोली लानाः स्वम्ह मिसात सिगु घटनाय् सेनाया दोषी खनेदुगु प्रतिवेदन सार्वजनिक जूगु दु । प्रतिवेदनय् सेनां स्वम्हेसितं नियन्त्रणय् कयाः हत्या याःगु ठहर यानातःगु दु ।
घटनाया स्गलगत अध्ययन लिपाः अनौपचारिक क्षेत्र सेवा केन्द्र (इन्सेक) मध्यपश्चिम क्षेत्र ज्याकू व एड्भोकेसी फोरमं मंगलवाः नेपालगञ्जय् सार्वजनिक याःगु अध्ययन प्रतिवेदनय् छखाः हे छेँयाः अमृता, देवीसरा व वया म्हाय् झिंनिदँया चन्द्रा विकया नियन्त्रणय् कयाः हत्या याःगु खँ न्ह्यथनातःगु दु ।
बर्दिया राष्ट्रिय निकुञ्जया प्यम्ह वनरक्षक व ज्वाला दल गणया झिंन्हय्म्ह सेनाया पुचलं द्यनेगु तयारी यानाच्वंपिं स्वम्ह मिसातय्त नियन्त्रणय् कयाः बिस्यूवंसाः स्यानाबीगु ख्याच्वः बियाः हवाई फायरिङ्ग याःगु खः । प्यंगू राउण्ड हवाई फायरिङ्ग लिपाः स्वम्ह मिसात छगः ल्वँया ल्यूने सुलाच्वंगु व अन हे सेनाया पुचलं घेरा तयाः हत्या याःगु खँ प्रतिवेदनय् न्ह्यथनातःगु दु ।
