अविश्वासया प्रस्ताव पेस जुइफु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' संसदया विशेष अधिवेशनय् वर्तमान सरकार विरुद्ध अविश्वासया प्रस्ताव पेस जुइफुगु खँ धयादीगु दु । वय्कलं परिस्थिति स्वयाः थुकीया बारे पलाः ल्ह्वनीगु धयादिसें आः हे थुकीया बारे निर्णय मजुनीगु धयादिल ।
क्रान्तिकारी पत्रकार संघं मंगलवा: नेपालगञ्जय् ग्वसाःग्वःगु पत्रकार सम्मेलनय् प्रचण्डं छवाःया दुने सहमति मजुसाः प्रकृया पूवंकाः राज्य पुनर्संरचना व शासकिय स्वरुपया बारे क्वःछीगु धयादिल । वय्कलं जेठ १४ गते हे संविधान निर्माण यायेत छवाःया दुने सहमति मजुसाः प्रकृया पूवंकाः निर्णय यायेत थःम्हं संयन्त्रय् प्रस्ताव यंकाःगु धयादिल ।
सेना समायोजन प्रति प्रधानसेनापतिया लिप्पांगु अभिव्यक्ति व सरकारया ज्याखँ पाखें शान्ति प्रकृयाय् आशंका ब्वलंगु धयादिसें माओवादी अध्यक्ष प्रचण्डं माओवादी शिविरय् लडाकु मदु धइगु सरकारी धापू असत्य जूगु धयादिल । वय्कलं गुली ल्याख्य् माओवादी लडाकु सेनाय् समायोजन जुइगु धइगु बारे सहमति यानाः निर्णय यायेगु धयादिल ।
उखे सिमराय् पत्रकारत नाप खँल्हाबंला यानादिसें माओवादी उपाध्यक्ष डा. बाबुराम भट्टराईं सरकार विरुद्ध अविश्वासया प्रस्ताव ह्येत हस्ताक्षर अभियान मन्ह्याकाःगु धयादिल । वय्कलं माओवादीयात आः सत्ता स्वयां नं संविधान अत्यावश्यक जूगु धयादिसें थुकीयात हे दक्वसिनं प्रथमिकताय् तयेमाः धयादिल ।
