संविधान जारी मजुसाः गृहयुद्ध : गौतम
नेकपा (एमाले)या उपाध्यक्ष बामदेव गौतमं इलय् हे संविधान जारी मजुसाः देशय् गृहयुद्धय् जुइफुगु ख्याच्वः बियादीगु दु । वय्कलं जेठ १४ गते संविधान जारी मजुसाः ल्वाभः दुपिनि ल्हातय् सत्ता लाइगु दाबी यानादिल ।
मंगलवाः नेपालञ्जय् प्रेस चौतारीं याःगु छगू पत्रकार सम्मेलनय् नेता गौतमं एमाले राष्ट्रिय सहमतिया सरकार गठन जुइमाःगु पक्षय् दुगु धयादिसें माओवादीं थःत नागरिक पार्टीलय् रुपान्तरण याःसा वयात सरकारया नेतृत्व बीत एमाले तयार दुगु धयादिल ।
वय्कलं न्हापा जूगु सहमति कार्यान्वयन मजुतल्ले माओवादी नेतृत्वया सरकार गठन जुइमफइगु दाबी नं यानादिल । वय्कलं सरकारया नेतृत्व मालाच्वंगु माओवादीं न्हापा दलत नाप सहलह यानाः पुलांगु सहमतित कार्यान्वयन यायेगु प्रतिबद्धता प्वंकेमाःगु धयादिल । वय्कलं राष्ट्रिय सहमति जुसाः सरकारया नेतृत्व त्वःतेत एमाले तयार दुगु धयादिल ।
