राप्रपा नेपालं सरकारयात ब्यूगु समर्थन बारे पुन:बिचाः याइगु

राष्ट्रिय प्रजातन्त्र पार्टी नेपालं सरकारयात ब्यूगु समर्थनया बारे पुन:बिचाः याइगु खँ धाःगु दु । प्रधानमन्त्री माधवकुमार नेपालं मंगलवा: स:तादीगु संविधासभाय् दुथ्याःगु नीप्यंगू दलया बैठकय् थंज्याःगु खँ तःगु खः ।

बैठक लिपाः पत्रकारत नाप खँल्हाबंला यानादिसें राप्रपा नेपाल संसदीय दलया नेता चन्द्रबहादुर गुरुङं सरकारयात ब्यूगु समर्थन लित कायेगु बारे पार्टी दुने सहलह जुयाच्वंगु धयादिल । वय्कलं संविधान निर्माण व शान्ति प्रकृयाया सम्बन्धय् सरकारया भूमिका सन्तोषजनक मजूगुलिं थःगु पार्टीं समर्थनया बारे पुन:बिचाः यायेमाःगु अवस्था वःगु धयादिल ।

वय्कलं इलय् हे संविधान जारी यायेत राप्रपा नेपालं याःगु शान्तिपूर्ण आन्दोलनय् सरकारं दमन याःगु द्वपं नं बियादिल ।