सुरक्षा व्यवस्था सुदृढ जूगु गृहमन्त्रीया दावी
गृहमन्त्री भीम रावलं विशेष सुरक्षा योजना लागू जुइधुंकाः देय्या शान्ति सुरक्षाया अवस्था सुदृढ जुयवःगु दावी यानादीगु दु । वय्कलं सुरक्षा निकायलय् च्वनाः अपराधीत नाप मिले जुयाः ज्या यानाच्वंपिं छथ्वः पुचःया कारणं सुरक्षाय् समस्या वःगु धयादिसें अज्याःपिंत सरकारं कारवही यायेगु ख्याच्वः बियादिल ।
प्रेस चौतारी नेपालं मंगलवाः नेपागञ्जय् याःगु पत्रकार सम्मेलनय् वय्कलं न्हापाया तुलनाय गुला न्ह्यः निसें सुरक्षा व्यवस्था बांलानाव:गु दावी यानादिल । वय्कलं गृहराज्य मन्त्री रिजवान अन्सारीं राजीनामा बी न्ह्य: पदय् च्वनाः अनुशासनहीन ज्या याःगुलिं कारवाहीलय् लाःगु दावी यानादिल ।
वय्कलं सरकार विरुद्ध माओवादीं ह्येत्यंगु अविश्वासया प्रस्तावं राजनीतिक अस्थिरता ब्वलंकीगु धयादिसें थुकीया विरुद्ध एमाले व सरकारं डटे जुयाः सामना याइगु धयादिल । नापं वय्कलं इलय् हे संविधान निर्माण यायेत व शान्ति प्रकृयायात तार्किक निष्कर्षय् थ्यंकेत माओवादी बाधक जूगु द्वपं नं बियादिल ।
