अमेरिका वनीगु जुइवं भूटानी शरणार्थीं ब्वनेगु त्वःतल
येँ (सन्ध्या टाइम्स)/नेपाः वयाः शरणार्थी जीवन हनाच्वंपिं भूटानी शरणार्थीतय्त अमेरिका लगायत विश्वया थीथी विकसित देशय् पुनर्वासया निंतिं यंकीगु जुइवं शरणार्थीतय् मस्तय्सं आखः ब्वनेगु त्वःता हःगु दु ।
आखः हे मब्वंसां नं अमेरिका यंकीगु जुइवं शरणार्थी मस्तय्सं आः ब्वनेमाःगु आवश्यकता मदु धइगु तायेकाः स्कूल वनेगु बन्द याना हःगु खः। थुकिं यानाः भूटानी शरणार्थी मस्तय्त आखः ब्वंकेगु लागिं धकाः झापाया थीथी थासय् चायेकातःगु स्कूलत खाली जुया वःगु खँ स्कूलतय्सं धाःगु दु ।
उलि जक मखु थःपिं अमेरिका लगायतया देशय् वने दइगु जुइपिं शरणार्थी मस्त न्हापा स्वयां उन्मादी व उत्तेजक नं जुया वःगु खँ धाःगु दु। उमित सुनां नं स्कूल हुँ धाल कि धाःम्हलिसे हे ल्वाः वनीगु व अभिभावकतय्सं धाःगु खँ नं मन्यनेगु याना हःगुलिं आः उपिं सुयां नियन्त्रणय् मदयावंगु खँ धाःगु दु ।
छगू निगू घटनाय् उमिसं स्कूलया शिक्षकतय्त समेत दाःगु खँ धाःगु दु ।
