दोषीयात कारवाही जुइगु रक्षामन्त्रीया प्रतिबद्धता

रक्षामन्त्री विद्यादेवी भण्डारीं सुर्खेतया हरिहरपुरय् गोलीं क्येकाः स्वम्हेसित स्याःगु घटनाय् दोषी जूपिं नेपाली सेनाया जवानतय्त कारवाही यायेगु प्रतिबद्धता प्वंकादीगु दु । रक्षा मन्त्रलायलय् वन व भूसंरक्षण मन्त्री दीपक बोहरा नापया सहलह लिपाः पत्रकारत नाप खँल्हाबंला यानादिसें वय्कलं दोषी सेनायात कारवाही जुइगु खँ कनादीगु खः ।

वंगु फागुन २५ गते गस्तीइ वनाच्वंगु सेनां क्येकूगु गोलीं लाना: सुर्खेत हरिहरपुर गाविस-२या स्वीन्यादँया देवीसरा विक, स्वीस्वदँया अमृता विक व झिंनिदँया चन्द्रकलाम विक सीगु ख: । घटनाया कन्हय् कुन्हु सेनां चोरी निकासीया आशंकाय् गोली चले याःगु वक्तव्य सार्वजनिक याःगु खः । तर सिपिनिइ छेँजःपिंसं सेनां मिसातय्त बलत्कार या:गु व लिपाः गोलीं क्येका: स्याःगु धासें पोष्टमार्टम यायेत नं अस्वीकार याःगु दु । उमिसं घटनाया छानबिन यायेमाःगु व दोषीयात कारवाही यायेमाःगु माग यानाच्वंगु दु ।