छवाः दुने राजनीति गतिरोध ज्यनी : गच्छदार
उपप्रधान नापं भौतिक योजना मन्त्री विजयकुमार गच्छदारं छवाः दुने हे राजनीतिक गतिरोध ज्यनीगु दावी यानादीगु दु ।
पत्रकारिता बिकास प्रतिष्ठानं मंगलवाः सर्लाहीलय् ग्वसाःग्वःगु पत्रकार नापलायेगु ज्याझ्वलय् न्ववानादिसें मन्त्री गच्छदारं सरकार विरुद्ध माओवादीं ह्येत्यंगु अविश्वासया प्रस्तावया बारे अन्यौल ब्वलनाच्वंसां थ्व छवाःया दुने हे समाधान जुइगु धयादिल । वय्कलं थः येँय् लिहांवनेवं अस्थिरता व आन्यौल चीकाः दक्वसितं छथाय् हे ह्येगु कुतः यायेगु धयादिल ।
मधेशी जनअधिकार फोरम लोकतान्त्रिकया अध्यक्ष नापं जुयादीम्ह गच्छदारं प्रधानसेनापतिं माओवादी लडाकुया समूहगत समायोजन सेनायात अमान्य जुइ धाःगु धापू प्रति समर्थन प्वंकादिसें राजनीतिक पार्टी पाखें प्रशिक्षित लडाकुयात नेपाली सेनाय् समूहगत समायोजन यायेमज्यूगु धयादिल ।
अथेहे वय्कलं इलय् हे संविधान जारी यायेत सरकार दृढ संकल्प सहित न्ह्याः वनाच्वंगु धयादिसें संविधान जारी मजुसाः देशय् तःधंगु समस्या ब्वलनीगु ख्याच्वः बियादिल । वय्कलं स्वंगू प्रमुख राजनीतिक दलया नेतातय्त पार्टीगत स्वार्थ स्वयां च्वये वनाः संविधान निर्माणया ज्याय् लगे जुइत इनाप नं यनादिल ।
