संयन्त्रया बैठक निष्कर्षविहीन
सोमवाः निक्वः तक उच्चस्तरीय राजनीतिक संयन्त्रया बैठक च्वसां अन्त्यय् बैठक बिना निष्कर्ष क्वचाःगु दु । सोमवाः सुथय् होटल अन्नपूर्णय् च्वंगु संयन्त्रया बैठकय् छुं सहमति मजुइवं हानं न्हिनय् न्हू बानेश्वरय् च्वंगु संविधानसभा भवनय् बैठक च्वंगु खः ।
बैठकय् इलय् हे संविधान निर्माण यायेगु, सेना समायोजन, राज्य पुनस्रंरचना आयोग गठन, माओवादीं कब्जा यानातःगु छेँबुँ लितःबीगु, न्हापाया सम्झौता पलना लगायत विषयलय् सहलह जूगु खः । तर बैठकय् इलय् हे संविधान निर्माण यायेगु बाहेक मेगू खँय् दलत दथुइ सहमति जुइमफुत ।
अथेहे बैठकय् राज्य पुनर्संरचना आयोग गठन यायेगु बारे सैद्धान्तिक सहमति जुसां उकीया कार्यक्षेत्रया बारे विवाद जुइवं सहमति जुइमफुगु खः । कांग्रेस व एमालें राज्य पुनर्संरचना आयोगयात दक्वं विषयलय् सुझाव बीगु अधिकार बीमाःगु अडान काःगु खःसा माओवादीं आयोग मार्फत छुंछुं प्राविधिक खँय् जक ग्वाहालि कायेगु बिचाः प्वंकूगु खः ।
