सेनायात नेताया भाय् न्वमवायेत बाबुरामया इनाप
एकीकृत नेकपा (माओवादी)या उपध्यक्ष डा. बाबुराम भट्टराईं लडाकु समायोजनया विषयलय् न्यानलाथें न्वमवायेत नेपाली सेनायात इनाप यानादीगु दु । वय्कलं राजनीतिक दलतय्सं न्ववायेमाःगु विषयलय् कर्मचारी जुयाः न्हानलाथें न्वमवायेत प्रधानसेनापतियात इनाप यानादिल ।
छुं दिं न्ह्यः संयुक्त राष्ट्रसंघया राजनीतिक मामिला सम्बन्धी उपमहासचिव बी लिन पास्को नापया खँल्हाबंलाय् प्रधानसेनापति छत्रमानसिंह गुरुङं नेपाली सेनायात माओवादी लडाकुया समूहतग समायोजन अमान्य जुइगु खँ धयादीगु खः ।
पार्टीया आन्तारिक ज्याझ्वलय् भैरहवाय् थ्यंकादीम्ह भट्टराईं सोमवाः अन ग्वसाःग्वःगु पत्रकार सम्मेलनय् न्ववानादिसें थःगु पार्टीया नेतृत्वय् बाहेक मेगू पार्टीया नेतृत्वया सरकारयात माओवादीं स्वीकार मयाइगु धयादिल । इलय् हे संविधान निर्माण यायेत व शान्ति प्रकृयायात तार्किक निष्कर्षय् थ्यंकेत थःगु पार्टीया नेतृत्वया राष्ट्रिय मंकाः सरकारया गठन जुइमाःगु खँ वय्कलं धयादिल ।
लोकतान्त्रिक मुल्य मान्यता कथं दकलय् तःधंगु पार्टीं हे सरकारया नेतृत्व याये दयेमाःगु अडान कयादिसें नेता भट्टराईं इलय् हे अग्रगामी संविधान निर्माण मजुसाः तःधंगु संवैधानिक संकट जुइगु व प्रतिगामीतय्त फाइदा जुइगु धयादिल । जनतापाखें बहिष्कार जूपिं सरकारय् वनाः देय्यात अनिर्णयया बन्दी दयेकूगु द्वपं नं वय्कलं बियादिल ।
