शिक्षण अस्पतालय् आकस्मिक बाहेकया सेवा बन्द
त्रिभुवन विश्वविद्यालय शिक्षण अस्पतालया चिकित्सकतय्सं आकस्मिक व अन्तरंग बाहेकया दक्वं सेवा सोमवाः बन्द या:गु दु । त्रिवि चिकित्सा शास्त्र अध्ययन संस्थान डीनया ज्याकूथीं काःगु स्नातकोत्तर परीक्षाय् अनियमितता जूगु धासें चिकित्सकतय्सं सोमवाः निसें अनिश्चितकालया निंतिं सेवा ठप्प यायेगु घोषण याः गु दु ।
चिकित्सकतय्सं याःगु बन्दया कारणं सोमवा: बिरमीत स्वस्थ्य उपचार पाखें प्रभावित जूगु दु । थीथी संगठन सम्बद्ध दुजः दुथ्याःगु संघर्ष समितिं थुगु बन्दया घोषणा याःगु खः । त्रिवि प्राध्यापक संघ महाराजगन्ज चिकित्सा क्याम्पस इकाई, नेपाल रेजिडेन्ट डाक्टरर्स एसोसिएसन, शिक्षण अस्पताल याकल्टी डाक्टर्स एसोसिएसन, नर्सिङ क्याम्पस व महाराजगन्ज क्याम्पसया स्ववियुलगायत शिक्षण अस्पतालया कर्मचारी प्रतिनिधितय्सं आइतवा: न्हय्म्ह दुज: दुगु संघर्ष समिति दयेका: अनिश्चितकालीन बन्दया घोषणा या:गु ख: ।
संघर्ष समितिं एमडी/एमएसया निन्हुन्यंकया परीक्षा रद्द यायेमा:गु, डीन, सहायक डीनं राजीनामा बीमा:गु व घटनाया छानबिन याना: दोषीयात कडा कारबाही यायेमा:गु लगायत माग या:गु दु ।
